الرئيسية / كورة سوشيال / اعضاء سموحه يشتكون فرج عامر للاهمال الجسيم

اعضاء سموحه يشتكون فرج عامر للاهمال الجسيم

نقلها خليل ابو العلا من صفحه جروب اعضاء نادي سموحه

السلام عليكم اعضاء نادي سموحه الكرام

عندي تجربه مريره جدا مع مصيف نادي سموحه بمرسي مطروح مع اني مش اول مره اروح هناك

بدايه بيوم الوصول انا ذهبت بسيارتي الخاصه و الحمد لله عند استلام الاوضه وجدت الحمام في حاله مزريه للغايه القاعده مكسوره و الدش وقع عند فتح المياه و الشطافه بايظه و لما طلبت من الاستقبال يجي يصلح الحمام و ان ازاي المصيف بقي بالمستوي ده كان الرد ان السباك مش موجود حاليا و لما يجي هبعتهولك و لما قولتلهم انا اخلي الاولاد يمسكو نفسهم لحد ما الاستاذ السباك يوصل ازاي يعني معلش تطوع احد عمال النظافه و جه صلح الحمام الحمد لله و مشكور انه عمل شغل مش شغله لانقاذ الموقف طلعت من الحمام لقيت الغرفه بدون ريموت تكيف و لما سالت فين الريموت قالي حضرتك ممنوع تاخده في فني مخصوص لريموت التكيف متخيلين!!!! ليه ؟؟؟ اصل تعليمات الاداره عدم ترك ريموت التكيف بالغرفه !!! طيب لما تعوز تعمل اي حاجه في التكيف كلم فني التكيف و دي نمرته !!! و بالفعل التكيف مظبوط علي ٢٥ و ده معقول بليل فقط لكن الصبح الجو حر جدا و مش هيسقع الغرفه و بليل ٢٣ او ٢٤ هيبقي ساقع . طيب سابين ريموت التلفزيون و الدش ليه متعينو فني لكل واحد كمان و طبلت امنهم اديهم ٥٠٠ جنيه رهن للريموت و استلامهم مع تسليم الغرفه و التكيف و الريمون ولكن طبعا منفعش ،،،، و لو الاداره بتفكر ان كده هتوفر لما تخلي التكيف مظبوط علي ٢٥ علشان الكهرباء فاحب اقولهم ان الناس علشان مفيش ريموت بتسيب التكيف شغال و هي في البحر و ده هيكلفهم كهرباء اكتر ، فتفكير عقيم من الاداره في الموضوع ده ، نيجي بقي للاكل و ده الانا و كل الناس شايفينه اهانه اكتر من انه وحش جدا ، الكميات انا مش هكلم فيها لانها سد جوع مش اكل ولكن جوعو تصحو مش مشكله !!! الاكل طعمه سيئ جدا جدا جدا و المكونات رديئه للغايه و انا و كل الناس المعايا الحمد لله ماشين بالانتينال و الاستربتوكين علشان نقدر نواصل ، اول يوم غذاء قطعه مكرونه بالبشامل متتاكلش و نص كتكوت و الطفل ربع كتكوت ، العشاء كان جبنه بيضاء و جبنه رومي و بيض و ده انا شايفه كويس الصراحه الكميه و الطعم و كذالك الفطار زياده عليهم فلافل مقليه بزيت عربيات و فول استغفر الله محدش يتقبله ابدا و الغذاء تاني يوم سمك و رز او كفته ضاني بالصلصه و دي احد اهم الاسهال و وجع البطن في الرحله ، العشاء تاني يوم المفروض فراخ مكسيكان و رز مكسيكي و الحقيقه رز ابيض بتاع الفته محصرم و قطع فراخ بالصوص الابيض بدمها و دي كانت في سباق الاسهال و وجع البطن مع الكفته الضاني ، عذاء ثالث يوم كان مكس جريل و كان عباره عن بواقي الفراخ بتاع غداء تاني يوم بس حطوها علي الشوايه شويه اخدت طعم الفحم اما الكفته مش بطاله و العشاء بقي شاورما شغت لحمه نيه والله الكلب ميرداش ياكلها و ٢ معلقه مكرونه ام ٢ جنيه الكيلو ، انا شايف ان المصيف و اداره النادي بتهين الاعضاء الكرام بالمصيف ده ولازم الاداره تشوف حل يا تقفله لان الاعضاء لا تقبل الاهانه مطلقاً

و السلام ختام و ان شاء الله اخر مره و مبروك عليكم مكان في سباق القرعه السنين القادمه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *