أخبار عاجلة
الرئيسية / أخبار ماسبيرو / منتصر مونتي: نجم الاعلاميين يغزو عالم الفن بفنجان شاي

منتصر مونتي: نجم الاعلاميين يغزو عالم الفن بفنجان شاي

كتب : خليل ابو العلا 

بقلم الاعلامي منتصر مونتي الساخر بدء يغزو عالم الكوميديا المكتوبه ببكر كتاباته فنجان شاي … الذي نال اعجاب رموز الفن والكوميديا والجماهير … ليسطع نجم جديد من ابناء الاعلاميين للفن الساخر .

#فنجان_شاي
(مشاهد كوميدية من الحياة الزوجية)
جريدة كنوز العربية
الحلقة الثانية
https://kenoozarabia.com/2020/01/09/فنجان-شاي-

##فنجان_شاي (2 )##

ولما كانت الرشفة الثانية من الشاى المحلى بالنعناع وأنا مستلقي على كرسي المكتب الوثير …واضعا قدمي فوق المكتب مشعلا سيجارتي .. مسترجعا ما حل بي من كدمات وكسور بعد ما اكتشفت المدام اني اهلاوي..
إذا بالهاتف ينقذني من إحساسي بالألم
و كعادته في إزعاجي يوميا … كان المتحدث طارق وشهرته اللهلوبة لمهارته في أمور المنزل من غسيل وكنس وطبخ فهو يجد في هذا سر رضا المدام عليه .. ياله من محظوظ ..
: صباح الخير يا كبير
انجز يا لهلوبه عايز ايه عالصبح

: بص يا عم مونتي انا زهقت من شغل البيت وعايز اتحرر .. عايز أكون سيد قراري .. عايز ارجع سي السيد تاني

(أفرك يدي فرحا أخيرا .. الحسد جاب نتيجه!! .. )
اتظاهر بالاهتمام في ردي عليه

: يا طارق طالما اسيادنا راضيين عليك تبقى في نعمة … المدام والحمد لله راضيه عنك … ما تبقاش دبور وزن على خراب عشه …

: يا مونتي دي مصممه تعمل فريق خماسي كرة نسائية واقعد انا مع العيال في البيت يرضيك …؟!

: سيبني أنا أتصرف والغي لك الفكرة دي خالص .. خلاااص انت من الاحرار يا طارق !

وبسرعة البرق مع تغيير نبرة الصوت اتصل بمدام طارق

: الو معاكي المدير الفني للكرة النسائية بالنادي ممكن تديني اسماء الفريق

: اكتب عندك … بنتي إسراء

:إسراء ؟! آه ..هي بتلعب كويس بس عيبها حاجة واحدة بس … علبة الميك اب ما بتفارقش ايديها في الملعب .. شفتها مرة منفردة بالجول وفي آخر ثانية وهتجيب جول لمحت ضافرها والمونيكير متجرح سابت الكورة وقعدت تعيط !!

: يبقى بلاها إسراء .. وكمان علشان محدش يقول علشان بنتي.. اكتب كابتن سماح

: كابتن سماح ..؟!
ومالوا ؟ هي بس عيبها بسيط جدا لو اتخلصت منه تدخل المنتخب … انها تثق فينا وفي كلامنا لما نحلف لها 100 يمين ان كرة القدم بتتلعب بالقدم مش بالإيد … وبعدين مش لازم كل ما اشوط كورة اطلع البيرفيم و الوايبس واروح ادي بنتي حضن وبوسه واسيب الماتش
: بلاها إسراء بلاها سماح … خلينا في رحاب

: دي…مفيش كلام … دي ام تريكه … سرعة ايه …رشاقه ايه .. بس ضيعتنا آخر ماتش … هجمة مرتدة لينا وهي والجول .. ومدام ام احمد الجوول كيبر للفريق التاني قالت لها ..زوومبا.. لقيناها سابت الكورة وهاتك يا رقص وزوومبا بذمتك يا مدام ينفع الكلام ده؟!

: معلش نسيت نفسها وفكرت انها في الايروبيكس … كده مفيش الا كابتن هناء

: ايوا كده دي لوحدها فرقة … صخرة في الدفاع … ممكن تتفوق على وائل جمعة بس لو تعرف ان مفيش شد شعر ولا ضرب بالقلم في منطقة الجزاء ولما اغز المنافس بمطواة قرن غزال واشرحه ممكن تتحسب فاول ولما نجيب جول نفرح مع بعض مش تجري على جوزها تاخد 100 جنيه وهاتك يا زغاريد !!

: اوووووف … انت النقاش معاك مالوش فايدة … أنا هالغي الفكرة
تنهي المكالمة بغضب بينما أنا أشعر بالانتصار لنجاح خطتي ..وفجأة هاتفي الآخر واذا بطارق يستغيث

: منك لله …يا مونتي!! .. وديتني في داهيه !!

: فيه ايه ؟! .. حكمت عليك بمواعين زيادة …؟
: يبكي قائلا ..يا رييت
: فيه ايه قلقتني؟؟

: مالها الكورة النسائية … كنا وافقنا وخلصنا …انا غلطان اني دخلتك يا مونتي!!

: اهدى بس وقولى فيه اييييه؟؟

: عرفت اني انا كلمتك علشان تلغي فكرتها ….
مونتي ..الحقني بتتصل بيهم كلهم واحدة واحدة وحالفين ليعملوا فريق مصارعه ..!!فاهم يعني ايه .؟؟
سمعت صوتي وجايه جري عليا !!… م ص ا ر ع ….اااااااه … ااااااااي…… م .و. ن .ت.ي الحقنيييي!!

ينقطع الخط وأعاود الاتصال مرة أخري لأجد تلك الرسالة على الطرف الأخر

… عفوا الزوج الذي تحاول الاتصال به الآن قد يكون مضروبا او مسحولا .. حاول الاتصال في وقت لاحق !!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *